上次同大家介紹過，而家嘅騙徒非常大膽、手法十分高明，唔單止訛稱替海關開賣走私名牌商品，更聲稱會將所得嘅收益全數作為慈善用途，騙取大眾嘅信任去光顧佢哋嘅冒牌貨。
重溫上篇 : 真假難分? 學識呢五招 網購唔會再中伏(上)
除咗上次嗰兩招之外，而家小編再同大家分享多三招，分析網店係咪值得信任。
3. 付款形式
千祈唔好以為「貨到付款」 「七天無理由退換貨」好信得過，所謂嘅「貨到付款」，一般係指物流公司嘅速遞員，送到包裹去你手上面嗰刻， 即係喺驗貨之前，你已經要畀晒錢。 當你拆開咗個箱，睇到件貨發覺有問題或者係假貨，去同嗰間網店投訴，一般騙徒都只會推三推四，又或者拖到你放棄為止，當然更大機會係搵都搵佢唔到。
反而部分網友成日好擔心嘅信用卡付款，因為技術發展多年，時至今日已經非常成熟，例如 PayPal ，Paydollar，Stripe 呢一類大型嘅 Payment gateway， 一般都會對買家提供一定保障，如果貨品有問題或者網店唔發貨的話，買家可以透過佢哋提出申訴，得到全額退款嘅保障。
4. 善用科技了解網店嘅歷史
我哋「Beefreight 比運費」雖然非常鼓勵商戶開設新網店，但毫無疑問營運時間相對比較長，有返一定歷史嘅網店，係會俾到普羅大眾較大嘅信心。以下幾個網上工具， 就正正可以幫大家搵出網店嘅歷史 :
– Whois (http://www.whois.net/) 同 Cloudfront (http://website-cloudfront.informer.com) 係翻查網站歷史嘅好工具，IP地址，伺服器名稱，註冊商，甚至屏幕截圖，不同嘅歷史記錄都可以搵得到。
– Alexa (http://www.alexa.com/) 可以俾你查看網站嘅受歡迎程度，鏈接到該網站嘅其他網站，估算每月流量，訪問該網站訪客嘅詳細信息（年齡，地區，性別）。
– PageRank (http://prchecker.info/) 會為每一個網站定出一個名為 PR 嘅數值，表示網頁喺網絡上嘅重要程度，個原理係，當一個頁面鏈接到另一個頁面時，它將會為另一個頁面投票，為頁面投票嘅票數越多，PR數值越高，頁面就排名越高。
– Black List Alert (http://blacklistalert.org/) 會將欺詐或經常發出垃圾郵件嘅可疑網站列入黑名單，如果某一間網店喺黑名單之中只顯示一次，咁可能只係一個誤判，但如果呢間網店比大多數伺服器標記為可疑網站，咁大家瀏覽時就要非常小心啦。
真金不怕洪爐火，大型網店願意提供嘅資料一般會較為詳盡，而快閃假網店嘅資料就會較為草率。
5) 聯絡方法
如果你想幫襯嘅係一間相對小型嘅本地網店，喺網上面又搵唔到太多佢嘅資料，咁就只能夠用一啲比較傳統嘅方法，例如睇下間網店有冇商業登記 (https://www.gov.hk/tc/residents/taxes/etax/services/brn_enquiry.htm)，門市地址或者嘗試聯絡佢哋嘅顧客服務部。
騙徒手法總匯
騙徒年年有，但唔知點解今年好似特別多，小編就黎個 2018 上半年假網店總匯，睇下啲騙徒手法有幾賤。
訛稱新店開張 / 裝修清貨
香港有購物天堂之稱，好多大型品牌都喺香港設有專門店，騙徒就利用呢一點，訛稱某某品牌新店開張又或者進行裝修清貨大減價，真假夾雜、呢招極易令網友中招。
淘寶扮上菜
以下呢堆，全部都係淘寶幾十蚊嘅貨式，但騙徒聲稱歐美品牌，以十倍價錢開售。產品都非常多元化，化妝品，電器，服裝，首飾 … 琳瑯滿目。而共通點就只有一樣 「假」，其中小編認為最討厭嘅莫過於係假嘅健康用品，用完無成效，仲令人有個假希望。
改寫生物進化論 ?
最後，如果要小編選擇一樣，今年上半年騙徒最積極推廣及銷售，同時「垃圾指數」又爆燈嘅產品， 一定會係以下呢一樣 「 三個月，助你長高 13cm 嘅增高貼」
仲自製假留言，真係離曬大譜。
網上買野雖然可以好抵，但同時亦要非常警覺，老土啲都要講句，如果有懷疑就千祈唔好幫襯啦。
如果你鍾意以上呢篇文章，歡迎同朋友 share。
